കൊച്ചിയിൽ കഴിഞ്ഞ ദിവസം നടന്ന ഫിലിംഫെയർ സൗത്ത് അവാർഡ്സിൽ അന്തരിച്ച നടൻ ശ്രീനിവാസനെ ആദരിച്ചത് ലൈഫ് ടൈം അച്ചീവ്മെന്റ് നൽകിയാണ്. താരത്തിന്റെ ഭാര്യ വിമലയും മകൻ വിനീത് ശ്രീനിവാസനും ചേർന്നാണ് പുരസ്കാരം ഏറ്റുവാങ്ങിയത്.
ഇപ്പോഴിതാ പുരസ്കാരം സ്വീകരിച്ച് വിനീത് കുറിച്ച വാക്കുകളാണ് ശ്രദ്ധേയമാകുന്നത്. അച്ഛന്റെ വിജയങ്ങൾക്ക് പിന്നിലെപ്പോഴും അമ്മയുണ്ടായിരുന്നുവെന്നും ഈ പുരസ്കാരം അമ്മയ്ക്കുള്ളതാണെന്നുമാണ് വിനീത് കുറിച്ചത്.
വളരെയധികം വിജയിച്ച ആ മനുഷ്യന്റെ പിന്നിൽ ഈ സ്ത്രീ ഉണ്ടായിരുന്നു. എപ്പോഴും ഈ സ്ത്രീയുണ്ടായിരുന്നു. ലൈഫ് ടൈം അച്ചീവ്മെന്റ് അവാർഡ് അമ്മയ്ക്കുള്ളതാണ്. വിനീത് ശ്രീനിവാസൻ ഫേസ്ബുക്ക് പോസ്റ്റിൽ കുറിച്ചു.
ശ്രീനിവാസനും പ്രശസ്ത സിനിമാ പ്രതിഭ ശ്രീകുമാരൻ തമ്പിക്കുമാണ് മലയാളത്തിൽ നിന്ന് ലൈഫ് ടൈം അച്ചീവ്മെന്റ് അവാർഡ് ലഭിച്ചത്. ഭ്രമയുഗത്തിലെ അഭിനയത്തിന് മമ്മൂട്ടി മികച്ച നടനുള്ള പുരസ്കാരം സ്വന്തമാക്കി.